ՃՏ-պատահարները` վերջին 5 տարում

Առաջիկա 5 տարիների ընթացքում ճանապարհատրանսպորտային պատահարների (ՃՏՊ) թիվը պետք է նվազեցվի 10 տոկոսով, այնինչ վերջին 5 տարում պատահարների թիվը տարեկան ավելացել է 10 տոսկոսով: Այս մասին այսօր ասուլիսում հայտարարեց ՀՀ տրանսպորտի և կապի նախարարի առաջին տեղակալ Հրանտ Բեգլարյանը` ներկայացնելով ՀՀ կառավարության վերջերս ընդունած Հայաստանի ճանապարհային երթևեկության անվտանգության ռազմավարության մանրամասները:
«Վերջին 5 տարում Հայաստանում չափազանց ավելացել է ՃՏՊ թիվը: Միայն 2008թ. գրանցվել է 2222 ՃՏՊ, որի հետևանքով զոհերի թիվը կազմել է 407 մարդ, վիրավորներինը` 3125 մարդ: Դա բավականին մեծ թիվ է»,- ասաց Հ. Բեգլարյանը:
Նա տեղեկացրեց, որ ռազմավարության համաձայն, իրականացվելու են մի շարք միջոցառումներ` ամրագոտիների ամրացում (որը սակայն ՃՏՊ պատճառների մեջ 0.01% է կազմում), նախատեսվում է ազգային խորհուրդ ստեղծել, որը կգլխավորի ՀՀ վարչապետը և կմասնակցեն շահագրգիռ բոլոր գերատեսչությունների ղեկավարները, ՀԿ ներկայացուցիչներ: Խորհուրդն ունենալու է գործադիր մարմին, որտեղ կլինեն տարբեր ոլորտների համապատասխան մասնագետներ: Կստեղծվեն նաև աշխատանքային խմբեր:
Հ. Բեգլարյանի տվյալներով, ՃՏՊ 25%-ը կատարվում է Երևանում, որից 75% դեպքերում խոցելի խմբերի մասնակիցներ են լինում` երեխաներ, ծերեր, հաշմանդամներ, հետիոտներ, հեծանվորդներ: Այս առումով նա կարևորեց հետիոտնային մշակույթի ստեղծման խնդիրը:
«Ճանապարհային անվտանգության ազգային խորհուրդ» ՀԿ նախագահ Պողոս Շահինյանը հայտնեց, որ ռազմավարության շրջանականերում Հայաստանում ներդրվելու է ճանապարհային անվտանգության աուդիտի ինստիտուտ:
Անդրադառնալով ամրագոտիների խնդրին` Պ. Շահինյանը նշեց, որ լավ կլիներ, եթե ճանապարհային ոստիկանությունն ինքը իր օրինակով վարորդներին ցույց տար դրանց կարևորությունը:
«Հասկանում եմ, որ օրենքով նրանք ազատված են ամրագոտիներ կապելու պարտավորությունից: Բայց նրանք էլ մարդ են և սխալից երաշխավորված չեն»,- ասաց Պ. Շահինյանը:
Ընդ որում, ըստ նրա, ամրագոտին նախատեսված է 30-70կմ/ժ արագության համար, իսկ մայրուղիներում ամրագոտիների ՕԳԳ նվազում է 60-70%:
 
21.08.2009, 16:26
Aysor.am

Աղբյուրը` http://www.aisor.am/am/news/2009/08/21/patahar/?swam

back